“சந்நியாசி நித்தியானந்தர் உரைக்கு மறுப்புரை”
(APJ அருள் @ இளங்கோ)
வேதம், ஆகமம், புராணங்கள் இவை பொய் புரட்டு என்று வள்ளலார் சொல்லவில்லை. இவை இடைச்செருகல். – நித்தியானந்தா.
வேதம், ஆகமம், சமயம், மதம், இதிகாசங்கள், புராணங்கள் இவை பொய். இவையில் லட்சியம் வையாதீர்கள். -– வள்ளலார்.
ஆதாரங்களுடன் ஆய்வு செய்வோம். உண்மை அறிவோம் – APJ அருள்.
***********************
பத்தொன்பதாம் நூற்றாண்டில் திருவருட்பிரகாச வள்ளலார் தனது கடைசி இரண்டரை வருடங்களில் (1871–1873) தான் வைத்திருந்த சமயப்பற்றை முற்றிலும் கைவிட்டுவிட்டு மற்றும் சாதி சமய மத மார்க்கங்களை கடந்தும், அவற்றின் ஆசார வகைகளை மற்றும் உலக ஆசாரங்களை ஒழித்துக் கொண்டும், உண்மை அறிவால் அறியப்படுகின்ற ஓர் புதிய மற்றும் பொதுவாக விளங்கும் ஒரு மார்க்கத்தை “சமரச சுத்த சன்மார்க்கத்தை” கண்டார்கள். இம்மார்க்கத்தை சித்திரை முதல் தேதி 1871-ம் ஆண்டு நமக்கு வெளிப்படுத்தினார்கள்.
வள்ளலாரின் சுத்த சன்மார்க்கத் தனி நெறி மீது, தாக்குதல் தொடர்ந்து தொடுக்கப்பட்டு வருகிறது.
இவர்கள் வள்ளலாரின் புதிய மார்க்கத்தின் பொது நெறியை உள்ளது உள்ளபடியாக தெரிந்துக் கொள்ளாமலும் மற்றும் அவர்களின் சாதிப் பற்று அல்லது வைதீக ஆசாரப்பற்று அல்லது சமய மதப் பற்று காரணமாகவும் மற்றும் வடலூர் நிலையங்களில் வேத ஆசாரங்களை, சமய வழிபாட்டை புகுத்த இன்று சிலரால் ,பல வழிவகைகளில், திட்டமிட்டு உள்ளவர்களாலும் வள்ளலாரின் உண்மை பொது நெறிமீது தாக்குதல் நடத்தப்படுகிறது எனலாம்.
அதன் வரிசையில் சில நாட்களுக்கு முன்பு சுத்த சன்மார்க்கத் தனி நெறியில் தாக்குதல் தொடுத்துள்ளவர், உலக பிரபலம், சந்நியாச ஸ்டார், உயர்திரு நித்தியானந்த சாமியின் ஒரு விடியோ இன்று வாட்சப்பில் பரவி வருகிறது. இந்த வீடியோ அவரின் வீடியோ தானா?
அல்லது ஏ.ஐ. மூலம் உருவாக்கப்பட்டதா எனத் தெரியவில்லை.
இருப்பினும் அதில் பரவி வரும் வாசகத்திற்கு மட்டும் நாம் மறுப்புரை கொடுப்பது கடமையாகும்.
இவரைப் போல் சிலரும் பேசி பரப்பி வருகின்றனர். அதனால் இந்த மறுப்புரை.
வள்ளலாரின் தனி நெறிக்கு முரணான இது போன்ற செய்திகளுக்கு நாம் பதில் அளிக்காவிட்டால், அவர்களால் பரப்படும் பொய்களானது உண்மை போல் தோற்றத்தை பெற்று விடும். இன்று பவுத்தத்திற்கு ஏற்பட்ட நிலையே வள்ளலாரின் சுத்த சன்மார்க்கத்திற்கு வருங்காலத்தில் ஏற்படும். அதனால் தான் இந்த விரிவான விளக்கம் ஆதாரத்துடன் தரப்படுகிறது. ஆதரங்களுடன் பதில் அளிப்போம். அன்புடன் ஏபிஜே அருள். நல்ல விசாரத்திற்கு வழிவகை செய்து உள்ளதாக நினைந்து அவருக்கு முதலில் நன்றியை பணிந்து தெரிவித்துக்கொள்கிறேன்.
திரு நித்தியானந்தா உரை மூலம் பரவிய செய்திகள்:
“வள்ளலார் வேதம், ஆகமம், புராணம் இவை புரட்டு எனச் சொல்லவோ அல்லது எழுதி வைக்கவோ இல்லை…. …. வள்ளலார் சொன்னதை அவங்க நோட்ஸ் எடுத்து சொன்னாங்களாம்… வள்ளலாரின் ஒரிஜினல் புக்ஸ் எல்லாம் பார்த்திட்டேன். பொய், புரட்டு என வருமிடங்களில் வேறு யாருடைய கையெழுத்து தான் இருக்கு… வள்ளலார் போன்றவர்கள் எத்தனை இடைச்செருகலை சந்தித்து இருப்பார்கள். ஆழ்ந்துவிட்டு பேசுங்கள்…..”
இந்த பரப்புரை, முழுக்க முழுக்க பொய்யானது மற்றும் வள்ளலாரின் தனி நெறி உலகில் விரைந்து பரவிடாமல் செய்ய திட்டமிட்ட செயல் ஆகும். அவரின் கூற்று பொய்யானது என்று நாம் ஆதாரங்களுடன் நிரூபிப்போம் அருள் துணையுடன். இவர் என்ன ஆவணங்களை பார்த்தார் என்றோ, அதுவும் ஒரிஜினல் என்கிறார், அது எவை எனச் சொல்லவில்லை.
அதற்முன் ஒரு முக்கிய விசயத்தை தெரிந்துக்கொள்ள வேண்டும்.
வள்ளலார் வெளிப்படுத்திய பாதை புதியது. இந்த புதிய பாதையை தெரிந்துக் கொள்ளக் கூடியவர்கள் யாராக இருக்க முடியும் என்றால்;
இந்த பாதையை அதாவது இந்த நெறியைதான் நான் தேடிக் கொண்டிருந்தேன் என்றுச் சொல்லக்கூடியவர்கள்;
வள்ளலார் காட்டும் நெறியானது எவர் அறிவிற்கு சரியெனப்பட்டு ஒருமையை பெற்றவர்கள்.
சமய மதங்கள் மீது எவ்வித விசாரம் இன்றி நம்பிக்கை வைப்பது போல் சுத்த சன்மார்க்கம் மீது விசாரமில்லாமல் நம்பிக்கை வைப்பது.
ஆனால், இன்று தீய நோக்கத்தோடு வள்ளலாரின் ஆசாரமில்லாத கருணை நெறி மீது பொய்யுரைகள் பரப்பப்படுவது வேதனையாகவுள்ளது. காரணம் வள்ளலாரின் சுத்த சன்மார்க்கத் தனி நெறியானது உலக உயிர்களுக்கான பொது நெறியாக உள்ளது. சரி விசாரத்திற்கு வருவோம். முதலில்;
வள்ளலாரின் சுத்த சன்மார்க்கத் தனி நெறியில், கடவுள் கொள்கை என்னவென்று தெரிந்துக் கொள்வது மிக, மிக அவசியம் ஆகும். இதுவே பல பேருக்கு புரியாமல் உள்ளது.
சுத்த சன்மார்க்கத்தில் கடவுள் கொள்கை என்ன? வழிபாட்டில் கடவுள் யார்? வள்ளலார் அக விசாரத்தில் கண்ட கடவுள் யார்? என்று வினவினால்;
சுத்த சன்மார்க்கத்தில் உண்மைக் கடவுளின் நிலையறிவதே கொள்கை. கடவுளின் உண்மை நிலையறிந்து, தரிசித்து, அருளால் நித்திய தேகத்தை பெறுவதே லட்சியம் ஆகும். உண்மையை ஆண்டவரே தெரிவிக்க வேண்ட வேண்டும்.
வழிபாட்டில்; “ஓர் உண்மை கடவுள் உண்டென்றும் உண்மை அன்பால் கருத்தில் கருதி வழிபாடு செய்தல் வேண்டும்.”
சமய சாத்திர புராணங்களில் வந்ததாக சொல்லப்படுகின்ற கர்த்தர், தெய்வம், யோகி, தலைவர் இவர்களில் “ஒருவரல்ல”. மேற்படி இவர்கள் எல்லோரும் எதிர்ப்பார்த்துக்கொண்டிருக்கும் தனித்தலைமை பெரும்பதி பெருங்கருணைக் கடவுளை கண்டேன் என்கிறார் வள்ளலார்.
நிற்க!
திருவருட்பிரகாச மார்க்கத்தில் அக அனுபவமே உண்மை ஆகும். வள்ளலார் பதிவு செய்து வைத்திருக்கும் மற்றும் எழுதியும் உபதேசித்தும் உள்ள அவரின் அகஅனுபவ காட்சிகள், கருணை செயல்கள் மற்றும் அருள் பயன்கள் இவை வைத்து பார்க்கும் போது இம்மார்க்கத்தின் கொள்கையைப் பற்றி நாம் தெரிந்துக் கொள்ள வருவது யாதெனில்;
ஆண்டவரே ஒருவரே! ஒன்றெனும் ஒன்றே!
கடவுள் நித்தியர், மற்றவை தத்துவங்களே,
இதை தெரிந்துக்கொண்டவரிடத்தில் தாழும் குணம் வரும்.
இரக்கத்தால் இறைவன் நமக்கு உண்மை தெரிவிக்க தொழ வேண்டும்
கருணை நன்முயற்சியில் அக அனுபவம் பெறுதலே அருளாகும்.
அருளால் நித்திய தேகம் பெற்று பேரின்ப பெருவாழ்வே வரமாகும்.
“ஒன்றெனும் ஒன்றே” என்பதின் பொருள் எல்லோராலும் தெரிந்துக்கொள்ள முடியும். தெரிந்துக்கொள்ள வேண்டும். ஒன்றெனும் ஒன்றாகிய ஒளியே எங்கும் எதிலும் பரிபூரணமாக நிறைந்து பரவி விளங்கி உள்ளது. ஒளியால் ஒளிவெளியில் எல்லாம் தோன்றி விளங்குகிறது. தோன்றியதினுள்ளும் அந்த ஒன்றேனும் ஒன்றின் ஒளியின் அம்சமே விளங்குகிறது. இந்த உண்மை இறைவனால் தான் விளக்கம் செயவிக்கப்படுகிறது.
நிற்க! மேற்படி விஷயங்களை ஊன்றி கவனித்து, கருத்தில் கொள்ள வேண்டும். காரணம் இந்த தனி நெறியை தெரிந்துக் கொள்ளாமல் தான் பல வேறுபட்ட கருத்துக்கள் தோன்றுகின்றன.
உலகில் சமய மதங்களில் காட்டப்பட்டு வணங்கப்படும் கடவுளர் எல்லோரும் உண்மை கடவுளின் அம்சங்களே என்கிறார் வள்ளலார். கடவுளின் நிலைப்பாட்டை உறுதிப்படுத்தும் முடிபுகள் ஆறு அந்தங்கள் ஆகும். இவையில் சமரசம் கண்டு அந்தங்கள் ஐக்கியப்பட்டு, உண்மை தெரிவதாக உள்ளது. தான் கண்ட கடவுள் பற்றி குறிப்பிடும் போது சமய மத சாத்திர புராணங்களில் வந்ததாக சொல்லப்படும் கடவுளர்களில் ஒருவரல்ல என்கிறார் வள்ளலார்.
ஆக, சமயங்களில் தனித்தனி காட்டும் கடவுளர்கள், இவர்கள் அனைவரும் உண்மை கடவுளின் ஒளி சொரூபத்தில் அடக்கம் என்கிறார். ஆனால் சமய கடவுளரிடத்தில் உண்மை கடவுளின் பரிபூரணத்தை நாம் நினைந்து, உணர்ந்து, அனுபவிக்க முடியாது.
உதாரணத்திற்கு, ஐந்நூறு ரூபாயில் நூறு ரூபாய் உண்டு. ஆனால் நூறு ரூபாயில் ஐந்நூறு இல்லை.
அது போல் தான். எல்லாம் கடவுளின் துகள்களே. ஆனால் துகளில் பூரணப் பொருளின் உண்மை அறிய முடியாது.
இதற்கு வள்ளலார் தரும் உதாரணம்: குருடர்களும் யானையும் என்ற கதை.
நான்கு குருடர்கள் யானையை தொட்டுப் பார்த்து யானைப்பற்றி தெரிந்துக் கொண்டது போல் சமய மதவாதிகள் கடவுளைப் பற்றி தங்கள் தங்கள் பெற்ற அனுபவங்களை கொண்டு முடிபாகக்கொண்டு அதையே வெளிப்படுத்தி, அதன் அடிப்படையில் சமயங்களை ஏற்படுத்தியுள்ளனர் என்பார் வள்ளலார்.
நான்கு குருடர்கள் ஒரு யானையை பிடிகின்றனர். அவர்கள் பிடித்திருந்த பகுதியை வைத்து பேசிக் கொள்கிறார்கள்.
யானையின் காலை பிடித்திருந்த ஒருவன் “யானை தூண் போல் உள்ளது” என்றான்.
யானையின் காதை பிடித்திருந்த 2ம் நபர்; “ இல்லை இல்லை யானை சொலகு போல் உள்ளது” என்றான்.
யானையின் வாலை பிடித்திருந்த 3ம் நபர்; “ இல்லை. யானை குச்சி போலுள்ளது” என்றான்.
யானையின் தும்பிக்கையை பிடித்திருந்த 4 ம் நபர்; “இல்லவே இல்லை யானை உலக்கை போலுள்ளது” என்றான்.
நிற்க! இங்கு இந்த நான்கு குருடர்கள் சொன்னது அவர்களின் நிலையில் சரியே. அனால் உண்மையில் இவர்களில் ஒருவரும் முழுமையாக யானையைப் பற்றி அப்படியே சொல்லவில்லை அப்படித்தானே.
காலை பிடித்தவர், யானை தூண் போல் உள்ளது எனச் சொல்லிவிட்டார்?. அவர் பிடித்தளவில், அவர் அறிந்தளவில், வியம்பினார். ஆனால் அவர் முழு உண்மையைவா உரைத்தார் ? இல்லை. அவரை குறைச் சொல்ல முடியாது. அதே நேரத்தில் அவர் கூற்றை உண்மை என்று அறிவில் ஒத்துக் கொள்ள முடியாது. அப்படித்தானே.
இதை சரியாகப் புரிந்துக் கொள்ளாதவர்கள் அல்லது புரிந்துக்கொள்ளக்கூடிய திறன் இல்லாதவர்கள் வள்ளலார் சொல்லும் உண்மை கடவுள் எங்கள் சமய வேத ஆகமங்கள் ஆரணங்கள் வியம்பும் கடவுளரே அன்றி வேறல்ல என்கிறார்கள். எல்லாம் கடவுளின் அம்சங்களே ஆனால் கடவுளின் பரிபூரண உண்மை இல்லை. கடவுள் இவரே எனச் சுட்டிக்காட்டுவது சிறுப்பிள்ளை விளையாட்டாக உள்ளது என்கிறார் வள்ளலார்.
இதன் அடிப்படையில் தான்,
பாடல்களில்,
வேதம் சமயம் அவற்றின் ஆரணம் ஆகமம் இவை தனித்தனி காட்டும் தெய்வங்கள் எல்லாம், ஒன்றெனும் ஒன்றாகிய அருட்பெருஞ்ஜோதியில் காணலாம் என்கிறார் வள்ளலார். இவை மட்டுமல்ல, எல்லா அந்தங்களும் வியம்பும் பல் கோடி கடவுளர்களை, ராசியத்தை, பொருளை, பதிகளை, குருவை எல்லாம், ஒன்றெனும் ஒன்றாகி விளங்கு செம்பொருளாகிய சிவமே என்கிறார் வள்ளலார்.
இதோ பாடல்கள்:
ஆறாம் திருமுறை / அருட்பெருஞ்ஜோதி அகவல்:
வேதா கமங்களின் விளைவுகட் கெல்லாம்
ஆதார மாஞ்சபை யருட்பெருஞ் ஜோதி
துரியமுங் கடந்ததோர் பெரியவான் பொருளென
உரைசெய் வேதங்க ளுன்னுமெய்ச் சத்தே
வேதமு மாகம விரிவுக ளனைத்தும்
ஓதநின் றுலவா தோங்குமந் திரமே
ஆறாம் திருமுறை / அருள்விளக்க மாலை
தவறாத வேதாந்த சித்தாந்த முதலாச்
சாற்றுகின்ற அந்தமெலாம் தனித்துரைக்கும் பொருளை
இவறாத சுத்தசிவ சன்மார்க்க நிலையில்
இருந்தருளாம் பெருஞ்சோதி கொண்டறிதல் கூடும்
எவராலும் பிறிதொன்றால் கண்டறிதல் கூடா…
ஆறாம் திருமுறை / இறை திருக்காட்சி
சுத்தவேத தாந்த பிரமரா சியத்தைச்
சுத்தசித் தாந்தரா சியத்தைத்
தத்துவா தீதத் தனிப்பெரும் பொருளைச்
சமரச சத்தியப் பொருளைச்
சித்தெலாம் வல்ல சித்தைஎன் அறிவில்
தெளிந்தபே ரானந்தத் தெளிவை
வித்தமா வெளியைச் சுத்தசிற் சபையின்
மெய்மையைக் கண்டுகொண் டேனே.
ஆறாம் திருமுறை / தனித் திருஅலங்கல்
பொருட்பெருஞ் சுடர்செய் கலாந்தயோ காந்தம்
புகன்றபோ தாந்த நாதாந்தம்
தெருட்பெரு வேதாந் தம்திகழ் சித்தாந்
தத்தினும் தித்திக்கும் தேனே
மருட்பெரு இருளைத் தீர்த்தெனை வளர்க்கும்
மாபெருங் கருணையா ரமுதே
அருட்பெருஞ் சோதி அம்பலத் தரசே
அம்மையே அப்பனே அபயம்.
சிற்சபையில் நடிக்கின்ற நாயகனார் தமக்குச்
சேர்ந்தபுறச் சமயப்பேர் பொருந்துவதோ என்றாய்
பிற்சமயத் தார்பெயரும் அவர்பெயரே கண்டாய்
பித்தர்என்றே பெயர்படைத்தார்க் கெப்பெயர்ஒவ் வாதோ
அச்சமயத் தேவர்மட்டோ நின்பெயர்என் பெயரும்
அவர்பெயரே எவ்வுயிரின் பெயரும்அவர் பெயரே
சிற்சபையில் என்கணவர் செய்யும்ஒரு ஞானத்
திருக்கூத்துக் கண்டளவே தெளியும்இது தோழி.
ஆறாம் திருமுறை / ஜோதியுள் ஜோதி
எம்பொருள் எம்பொருள் என்றே – சொல்லும்
எல்லாச் சமயத்துள் எல்லார்க்கும் ஒன்றே
செம்பொருள் என்பது பாரீர் – திருச்
சிற்றம் பலத்தே திருநட ஜோதி. ஜோதி
ஆறாம் திருமுறை / ஜோதியுள் ஜோதி
சைவ முதலாக நாட்டும் – பல
சமயங்கள் எல்லாம் தனித்தனிக் காட்டும்
தெய்வம் இதுவந்து பாரீர் – திருச்
சிற்றம் பலத்தே திருநட ஜோதி. ஜோதி
ஆறாம் திருமுறை / அன்புருவமான சிவம் ஒன்றே உளதெனல்
சமயம் ஓர்பல கோடியும் சமயங்கள் தோறும்
அமையும் தெய்வங்கள் அனந்தமும் ஞானசன் மார்க்கத்
தெமையும் உம்மையும் உடையதோர் அம்பலத் திறையும்
அமைய ஆங்கதில் நடம்புரி பதமும்என் றறிமின்.
ஆறு கோடியாம் சமயங்கள் அகத்தினும் அவைமேல்
வீறு சேர்ந்தசித் தாந்தவே தாந்தநா தாந்தம்
தேறும் மற்றைய அந்தத்தும் சிவம்ஒன்றே அன்றி
வேறு கண்டிலேன் கண்டிரேல் பெரியர்காள் விளம்பீர்.
ஆறாம் திருமுறை / இறை திருக்காட்சி
ஆரண முடிமேல் அமர்பிர மத்தை
ஆகம முடிஅமர் பரத்தைக்
காரண வரத்தைக் காரிய தரத்தைக்
காரிய காரணக் கருவைத்
தாரண நிலையைத் தத்துவ பதியைச்
சத்திய நித்திய தலத்தைப்
பூரண சுகத்தைப் பூரண சிவமாம்
பொருளினைக் கண்டுகொண் டேனே.
நிற்க! ஆக, ஒன்றெனும் ஒன்றாகிய செம்பொருள் நெறியே சுத்த சன்மார்க்கம் எனத் தெளிக. செம்பொருளே எல்லாமாக விளங்குகிறது எனப்படும்.
இல்லை.. இல்லை.. என்போருக்கு அதாவது சிறு துகள்களையே செம்பொருள் என்பதும், அம்சங்களையே பரிபூரணம் என்பதும், தூசிகளையே உண்மை நிலை என்பதும் இவையெல்லாம் சிறுபிள்ளை விளையாட்டே என்கிறார் வள்ளலார். அதனால் தான், முழு உண்மை காட்டாது, புறம்கவிய சொல்லாது போன வேதாகமம், சமயங்கள் இவைப்பற்றியும் இவற்றில் உள்ள ஆசாரங்கள் பற்றியும் வள்ளலார் கீழ்வரும் பாடல்களில் சொல்வதை பாருங்கள்:
சாதி பொய் ( பாடல்: 211 ),
சமயம் பொய், மதம் பொய் (212),
சாத்திரங்கள் குப்பை ( பாடல்: 64),
வேதநெறி ஆகமம் இவை சூது ( பாடல்:186 )
கலையாகிய இதிகாசங்கள், புராணங்கள் இவை கற்பனை ( பாடல்:187 )
பாடல் :452 -ல் சமய வலை
621- ல் நால்வருணம் ஆசிரமம், ஆசாரம் முதலியவை பிள்ளைவிளையாட்டே
625-ல் நான்முகர்,உத்திரர்கள் நாரணர் இந்திரர்கள் வாவில் அருகர் புத்தர் முதல் மதத்தலைவர் எல்லாம் ஒளி சிறிதே அடைந்து
657-ல் சமய மதக் குழி நின்ற என்னை எடுத்தானை
718- ல் பிரமன்,விண்டு,உருத்திரன் மாயேச்சுரன் சதாசிவன் …. இவர்கள்…கட்டைவிரல் நகத்தின் கடையுறு துகள் அன்று அறிந்தனன் அதன் மேல் கண்ணன் திருவடி நிலையே
719- ல் இவர்கள் பொதுவில் திருநடம் புரியும் துனையடிப் பாதுகைப் புறத்தே இடர் கெட வயங்கு துகள்
927- ல் மதம் பிடித்தவர் எல்லாம் வாய்ப்பிடிப் புண்டு வந்து நிற்கின்றனர் வாய் திறப்பிப்பான்
961- ல் தேய்வங்கள் பல பல சிந்தை செய் வாரும் …. வீண் கழிக்கின்றார்
995- ல் ஊடல் செய் மதமும் சமயமும்…
995- ல் மதத்திலே சமய வழக்கிலே மாயை மருட்டிலே இருட்டிலே… வீண் பொழுது கழிக்கின்றார்
996- ல் சமய நரகக் குழியிலே
1473- ல் சாத்திர கோத்திர சண்டையிலே அலைகின்ற உலகீர் அழிதல் அழகலவே …
1512- ல் வேதம் ஆகமம் என்று வீண்வாதம் ஆடுகின்றீர்
1571- ல் முன்னுள மார்க்கங்கள் யாவும் முடிந்தன
1546- ல் பயன் அடையா மூடமதம் அனைத்தும் முடுகி அழிந்திடவும் 1802- ல் சமயத் தெய்வம் பலவும் சிறிய துரும்பது
1919-ல் எச்சமயங்களும் பொய் சமயம் என்றீர்..
2113- மதித்த சமயமத வழக்கெல்லாம் மாய்ந்தது வருணாசிரமம் சாய்ந்தது .. ஒழிந்தது … அழிந்தது
2114- ல் குறித்த வேத ஆகமக் கூச்சலும் அடங்கிற்று — (இன்னும் பல நூறு பாடல்கள் உள)
வள்ளலார் தெளிவாக சொல்கிறார்கள்;
சுத்த சன்மார்க்கத்தில், பூர்வத்தில் சொன்ன சமய மதங்கள் அல்லாதனவே அன்றி இல்லாதனவல்ல. இதன் அடிப்படையில் தான், எல்லா சமயங்களுக்கும் எல்லா மதங்களுக்கும் எல்லா மார்க்கங்களுக்கும் உண்மை பொது நெறியாக சுத்த சன்மார்க்கம் விளங்குகிறது என்கிறார்.
உண்மையை நம்புதல் வேண்டும். உபாய மார்க்கமாக வணங்குதல் கூடாது. அப்படியே வணங்கினாலும் ஒன்றெனும் ஒன்றாகிய செம்பொருளை தான் குறிக்கும். ஆனால் நாம் அடைய வேண்டுவது சிவானுபவமே, அதனால் தான், முழு பயன் அருளாத உலகில் காணும் சமய மத மார்க்கங்களை சுத்த சன்மார்க்கத்திற்கு எக்காலத்திலும் முக்கியத்தடைகளாக அறிவிக்கிறார் வள்ளலார். இவைகளுக்கு, வள்ளலார் கைப்பட எழுதிய திருஅகவல், விண்ணப்பங்கள், பாடல்கள், கடிதங்கள், விதி வழிபாடுகள், இன்னும் பல நேரிடையான ஒரிஜினல் ஆவணங்கள் உள்ளன. அவை அனைத்தும் சமர்பிக்க நாங்கள் தயார். எங்கே? எப்போது? …… முடியுமா?
மார்க்கத்தார்களுக்கு கட்டளை:
வேதம், ஆகமம், சமயம், ஆரணம், இதிகாசம், புராணங்கள், அந்தங்கள், எவற்றிலும் சுத்த சன்மார்க்கத்தார்கள் லட்சியம் வைக்க வேண்டாம். நமக்கு காலமில்லை. மேலும் அவையின் மூலம் அடையப்போவது சிறு பயன்களே. நமது லட்சியம் உண்மை ஆண்டவரின் அடி நடு முடி நிலை காண்பதே அதனால் ஆன்ம அறிவைக் கொண்டே விசாரம் செய்ய வேண்டும். ஆண்டவரே வந்து உண்மை தெரிவிக்க வேணுமாய் வேண்டும் என்ற புதிய பொது வழியில் முயற்சிக்க வேண்டும். தலைவனைத் தொழுவதே கடமை.
வேதம் ஆகமம் சமயம் புராணங்கள் சாடும் பாடல்கள்: இதோ:
ஆறாம் திருமுறை / இது நல்ல தருணம்
குறித்த வேதாகமக் கூச்சலும் அடங்கிற்று
குதித்த மனமுருட்டுக் குரங்கு முடங்கிற்று
வெறித்தவெவ் வினைகளும் வெந்து குலைந்தது
விந்தைசெய் கொடுமாயைச் சந்தையும் கலைந்தது. இதுநல்ல
ஆறாம் திருமுறை / அருட்பெருஞ்ஜோதி அகவல்
வேதமு மாகம விரிவும் பரம்பர
நாதமுங் கடந்த ஞானமெய்க் கனலே
ஆறாம் திருமுறை / திருக்கதவந் திறத்தல்
வேதநெறி ஆகமத்தின் நெறிபவுரா ணங்கள்
விளம்புநெறி இதிகாசம் விதித்தநெறி முழுதும்
ஓதுகின்ற சூதனைத்தும் உளவனைத்தும் காட்டி
உள்ளதனை உள்ளபடி உணரஉரைத் தனையே
ஏதமற உணர்ந்தனன்வீண் போதுகழிப் பதற்கோர்
எள்ளளவும் எண்ணம்இலேன் என்னொடுநீ புணர்ந்தே..
ஆறாம் திருமுறை / அருள்விளக்க மாலை
நல்லாசொல் யோகாந்தப் பதிகள்பல கோடி
நாட்டியதோர் போதாந்தப் பதிகள்பல கோடி
வல்லார்சொல் கலாந்தநிலைப் பதிகள்பல கோடி
வழுத்தும்ஒரு நாதாந்தப் பதிகள்பல கோடி
இல்லார்ந்த வேதாந்தப் பதிகள்பல கோடி
இலங்குகின்ற சித்தாந்தப் பதிகள்பல கோடி
எல்லாம்பே ரருட்சோதித் தனிச்செங்கோல் நடத்தும்
என்அரசே என்மாலை இனிதுபுனைந் தருளே.
ஆறாம் திருமுறை / அருள்விளக்க மாலை
இயல்வேதா கமங்கள்புரா ணங்கள்இதி காசம்
இவைமுதலா இந்திரசா லங்கடையா உரைப்பார்
மயல்ஒருநூல் மாத்திரந்தான் சாலம்என அறிந்தார்
மகனேநீ நூல்அனைத்தும் சாலம்என அறிக
செயல்அனைத்தும் அருள்ஒளியால் காண்கஎன எனக்கே…
ஆறாம் திருமுறை / கண்டேன் கனிந்தேன் கலந்தேன் எனல்
நீட்டாய சித்தாந்த நிலையினிடத் தமர்ந்தும்
நிகழ்கின்ற வேதாந்த நெறியினிடத் திருந்தும்
ஆட்டாய போதாந்தம் அலைவறுநா தாந்தம்
ஆதிமற்றை அந்தங்கள் அனைத்தினும்உற் றறிந்தும்
வேட்டாசைப் பற்றனைத்தும் விட்டுலகம் போற்ற
வித்தகராய் விளங்குகின்ற முத்தர்கட்கும் தன்னைக்
காட்டாமல் ஒளித்திருக்குங் கள்வனைஎன் கண்ணால்
கண்டுகொண்டேன் கனிந்துகொண்டேன் கலந்துகொண்டேன் களித்தே.
ஆறாம் திருமுறை / சிவானந்தப் பற்று
ஆதியும் அந்தமும் இல்லாத் தனிச்சுட ராகிஇன்ப
நீதியும் நீர்மையும் ஓங்கப் பொதுவில் நிருத்தமிடும்
சோதியும் வேதியும் நான்அறிந் தேன்இச் செகதலத்தில்
சாதியும் பேதச் சமயமும் நீங்கித் தனித்தனனே.
ஆறாம் திருமுறை / உபதேச வினா
வேதாந்த நிலையொடு சித்தாந்த நிலையும்
மேவும் பொதுநடம் நான்காணல் வேண்டும்
ஆறாம் திருமுறை / திருவடிப் பெருமை
சோதிமலை ஒருதலையில் சோதிவடி வாகிச்
சூழ்ந்தமற்றோர் தலைஞான சொரூபமய மாகி
ஓதியவே றொருதலையில் உபயவண்ணம் ஆகி
உரைத்திடும்ஐங் கருவகைக்கோர் முப்பொருளும் உதவி
ஆதிநடு அந்தம்இலா ஆனந்த உருவாய்
அம்பலத்தே ஆடுகின்ற அடிஇணையின் பெருமை
வேதியனும் திருமாலும் உருத்திரளும் அறியார்
விளைவறியேன் அறிவேனோ விளம்பாய்என் தோழி
ஆறாம் திருமுறை / நடராஜபதி மாலை
நாதாந்த போதாந்த யோகாந்த வேதாந்த
நண்ணுறு கலாந்தம்உடனே
நவில்கின்ற சித்தாந்தம் என்னும்ஆ றந்தத்தின்
ஞானமெய்க் கொடிநாட்டியே
மூதாண்ட கோடிக ளொடுஞ்சரா சரம்எலாம்
முன்னிப் படைத்தல்முதலாம்
முத்தொழிலும் இருதொழிலும் முன்னின் றியற்றிஐம்
மூர்த்திகளும் ஏவல்கேட்ப
வாதாந்தம் உற்றபல சத்திக ளொடுஞ்சத்தர்
வாய்ந்துபணி செய்யஇன்ப
மாராச்சி யத்திலே திருவருட் செங்கோல்
வளத்தொடு செலுத்துமரசே
சூதாண்ட நெஞ்சினில் தோயாத நேயமே
துரியநடு நின்றசிவமே
சுத்தசிவ சன்மார்க்க நிதியே அருட்பெருஞ்
சோதிநட ராஜபதியே.
ஆறாம் திருமுறை / அன்புருவமான சிவம் ஒன்றே உளதெனல்
வாரம் செய்தபொன் மன்றிலே நடிக்கும்பொன் அடிக்கே
ஆரம் செய்தணிந் தவர்க்குமுன் அரிஅயன் முதலோர்
வீரம் செல்கிலா தறிமினோ வேதமேல் ஆணை
ஓரம் சொல்கிலேன் நடுநின்று சொல்கின்றேன் உலகீர்.
ஆறாம் திருமுறை / சுத்த சிவநிலை
வேதாக மங்களென்று வீண்வாதம் ஆடுகின்றீர்
வேதாக மத்தின் விளைவறியீர் – சூதாகச்
சொன்னவலால் உண்மைவெளி தோன்ற உரைக்கவிலை
என்ன பயனோ இவை.
ஆறாம் திருமுறை / மரணமிலாப் பெருவாழ்வு
பணிந்துபணிந் தணிந்தணிந்து பாடுமினோ உலகீர்
பரம்பரமே சிதம்பரமே பராபரமே வரமே
துணிந்துவந்த வேதாந்த சுத்தஅனு பவமே
துரியமுடி அனுபவமே சுத்தசித்தாந் தமதாய்த்
தணிந்தநிலைப் பெருஞ்சுகமே சமரசசன் மார்க்க
சத்தியமே இயற்கையுண்மைத் தனிப்பதியே என்று
கணிந்துளத்தே கனிந்துநினைந் துரைத்திடில்அப் பொழுதே
காணாத காட்சிஎலாம் கண்டுகொள லாமே.
ஆறாம் திருமுறை / தனித் திருஅலங்கல்
தற்பரம் பொருளே வேதத் தலைநின்ற ஒளியே மோனச்
சிற்பர சுகமே மன்றில் திருநடம் புரியுந் தேவே
வற்புறு மாயை எல்லாம் மடிந்தன வினைக ளோடே
இற்படும் இருளை நீக்கி இரவியும் எழுந்த தன்றே.
ஆறாம் திருமுறை / தனித் திருஅலங்கல்
வண்டணிபூங் குழல்அம்மை எங்கள்சிவ காம
வல்லியொடு மணிமன்றில் வயங்கியநின் வடிவம்
கண்டவரைக் கண்டவர்தம் கால்மலர்முத் தேவர்
கனமுடிக்கே முடிக்கின்ற கடிமலராம் என்றால்
பண்டகுநின் திருத்தொண்டர் அடிப்பெருமை எவரே
பகர்ந்திடுவர் மறைகளெலாம் பகர்ந்திடுவான் புகுந்தே
விண்டுலர்ந்து வெளுத்தஅவை வெளுத்தமட்டோ அவற்றை
வியந்தோதும் வேதி யரும் வெளுத்தனர்உள் உடம்பே.
ஆறாம் திருமுறை / மெய்யருள் வியப்பு
வேதா கமங்கள் புகன்ற விரிவை ஒன்றொன் றாக வே
விளங்க விரைந்து தெரித்தாய் பயிலும் ஆசை போக வே
பூதா திகளைப் பொருத்தும் பகுதிப் பொருத்தம் முற்று மே
பொய்மை நீக்கிக் காணக் காட்டித் தெரித்தாய் மற்று மே.
வேதா கமத்தின் அடியும் நடுவும் முடியு மற்று மே
வெட்ட வெளிய தாகி விளங்கக் கண்டேன் முற்று மே
நாதா சிறிய நாய்க்கும் கடையேன் முற்றும் கண்ட தே
நானோ கண்டேன் எந்தாய் கருணை நாட்டம் கண்ட தே.
ஆறாம் திருமுறை / அம்பலவாணர் வருகை
ஆகம வேதம் அனேக முகங்கொண்
டருச்சிக்கும் பாதரே வாரீர்
ஆருயிர் நாதரே வாரீர். வாரீர்
ஆறாம் திருமுறை / இது நல்ல தருணம்
குறித்த வேதாகமக் கூச்சலும் அடங்கிற்று
குதித்த மனமுருட்டுக் குரங்கு முடங்கிற்று
வெறித்தவெவ் வினைகளும் வெந்து குலைந்தது
விந்தைசெய் கொடுமாயைச் சந்தையும் கலைந்தது. இதுநல்ல
ஆறாம் திருமுறை / என்ன புண்ணியம் செய்தேனோ
ஓதிஎந்த விதத்தாலும் வேதியனும் தேர்வரியார்
ஓங்கார பஞ்சகத்தே பாங்காக நடிக்கின்றார்
ஆதியந்தம் காண்பரிய ஜோதிசுயஞ் ஜோதிஉன்னோ
டாடவந்தார் வந்தார்என்றே நாடிநாதம் சொல்கின்றதே. என்ன
ஆறாம் திருமுறை / சின்னம் பிடி
மீதான நிலைஏறிச் சின்னம் பிடி
வெட்டவெளி நடுநின்று சின்னம் பிடி
வேதாக மம்கடந்து சின்னம் பிடி
வேதாந்தச் சித்தாந்த சின்னம் பிடி
ஆறாம் திருமுறை / அனுபவ மாலை
நாதாந்த வரையும்எங்கள் நாயகனார் செங்கோல்
நடக்கின்ற தென்கின்றார் நாதாந்த மட்டோ
போதாந்த நிலையும்உயர் யோகாந்த நிலையும்
புனிதகலாந் தப்பதியும் புகல்கின்றார் புகலும்
வேதாந்த வெளியும்மிகு சித்தாந்த வெளியும்
விளங்கும்இவற் றப்பாலும் அதன்மேல்அப் பாலும்
வாதாந்தத் ததன்மேலும் அதன்மேல்அப் பாலும்
மன்றாடி அருட்செங்கோல் சென்றாடல் அறியே.
ஆறாம் திருமுறை / அனுபவ மாலை
கூசுகின்ற தென்னடிநான் அம்பலத்தே நடிக்கும்
கூத்தாடிக் கணவருக்கே மாலையிட்டாய் எனவே
ஏசுகின்றார் ஆரடியோ அண்டபகி ரண்டத்
திருக்கின்ற சத்தர்களும் சத்திகளும் பிறரும்
பேசுகின்ற வார்த்தைஎலாம் வள்ளல்அருட் கூத்தின்
பெருமையலால் வேறொன்றும் பேசுகின்ற திலையே
வீசுகின்ற பெருஞ்சோதித் திருக்கூத்தின் திறமே
வேதமுடன் ஆகமங்கள் விளம்புகின்ற தன்றே.
ஆறாம் திருமுறை / அனுபவ மாலை
என்புகல்வேன் தோழிநான் பின்னர்கண்ட காட்சி
இசைப்பதற்கும் நினைப்பதற்கும் எட்டாது கண்டாய்
அன்புறுசித் தாந்தநடம் வேதாந்த நடமும்
ஆதிநடு அந்தமிலாச் சோதிமன்றில் கண்டேன்
இன்பமய மாய்ஒன்றாய் இரண்டாய்ஒன் றிரண்டும்
இல்லதுவாய் எல்லாஞ்செய் வல்லதுவாய் விளங்கித்
தன்பரமாம் பரங்கடந்த சமரசப்பே ரந்தத்
தனிநடமும் கண்ணுற்றேன் தனித்தசுகப் பொதுவே.
ஆறாம் திருமுறை / அனுபவ மாலை
சரியைநிலை நான்கும்ஒரு கிரியைநிலை நான்கும்
தனியோக நிலைநான்கும் தனித்தனிகண் டறிந்தேன்
உரியசிவ ஞானநிலை நான்கும்அருள் ஒளியால்
ஒன்றொன்றா அறிந்தேன்மேல் உண்மைநிலை பெற்றேன்
அரியசிவ சித்தாந்த வேதாந்த முதலாம்
ஆறந்த நிலைஅறிந்தேன் அப்பால்நின் றோங்கும்
பெரியசிவ அனுபவத்தால் சமரசசன் மார்க்கம்
பெற்றேன்இங் கிறவாமை உற்றேன்காண் தோழி.
ஆறாம் திருமுறை / அருட்பெருஞ்ஜோதி அகவல்
ஆகம முடிமேல் ஆரண முடிமேல்
ஆகநின் றோங்கிய வருட்பெருஞ் ஜோதி
ஆறாம் திருமுறை / பரசிவ நிலை
தூண்டாத மணிவிளக்காய்த் துலங்குகின்ற தெய்வம்
துரியதெய்வம் அரியதெய்வம் பெரியபெருந் தெய்வம்
மாண்டாரை எழுப்புகின்ற மருந்தான தெய்வம்
மாணிக்க வல்லியைஓர் வலத்தில்வைத்த தெய்வம்
ஆண்டாரை ஆண்டதெய்வம் அருட்சோதித் தெய்வம்
ஆகமவே தாதிஎலாம் அறிவரிதாந் தெய்வம்
தீண்டாத வெளியில்வளர் தீண்டாத தெய்வம்
சிற்சபையில் விளங்குகின்ற தெய்வமதே தெய்வம்.
ஆறாம் திருமுறை / திருநடப் புகழ்ச்சி
ஆரணமே ஆகமமே ஆரணஆ கமத்தின்
அரும்பொருளே அரும்பொருளின் அனுபவமே அறிவே
காரணமே காரியமே காரணகா ரியங்கள்
கடந்தபெரும் பதியேஎன் கருத்தமர்ந்த நிதியே
பூரணமே புண்ணியமே பொதுவிளங்கும் அரசே
புத்தமுதே சத்தியமே பொன்னேசெம் பொருளே
தோரணமே விளங்குசித்தி புரத்தினும்என் உளத்தும்
சுத்தநடம் புரிகின்ற சித்தசிகா மணியே.
ஆறாம் திருமுறை / பெறாப் பேறு
அனந்தமறை ஆகமங்கள் அளப்பரிய சிவமே
அம்மேஎன் அப்பாஎன் ஐயாஎன் அரசே
மனந்தருவா தனைதவிர்த்தோர் அறிவினில்ஓர் அறிவாய்
வயங்குகின்ற குருவேஎன் வாட்டமெலாம் தவிர்த்தே
இனந்தழுவி என்னுளத்தே இருந்துயிரில் கலந்தென்
எண்ணமெலாம் களித்தளித்த என்னுரிமைப் பதியே
சினந்தவிர்ந்தெவ் வுலகமும்ஓர் சன்மார்க்கம் அடைந்தே
சிறப்புறவைத் தருள்கின்ற சித்தசிகா மணியே.
ஆறாம் திருமுறை / அடைக்கலம் புகுதல்
நீண்ட மறைகள் ஆகமங்கள் நெடுநாள் முயன்று வருந்திநின்று
வேண்ட அவைகட் கொருசிறிதும் விளங்கக் காட்டா தென்மொழியைப்
பூண்ட அடியை என்தலைமேல் பொருந்தப் பொருத்தி என்தன்னை
ஆண்ட கருணைப் பெருங்கடலே அடியேன் உன்றன் அடைக்கலமே.
ஆறாம் திருமுறை / திருவடிப் பெருமை
அருளாளர் பொற்பொதுவில் அற்புதநா டகஞ்செய்
ஆனந்த வண்ணர்எனை ஆளுடையார் சிறியேன்
தெருளாத பருவத்தே தெருட்டிமணம் புரிந்த
சீராளர் அவர்பெருமைத் திறத்தைஎவர் புகல்வார்
மருளாத ஆகமங்கள் மாமறைகள் எல்லாம்
மருண்டனவே என்னடிஎன் மனவாக்கின் அளவோ
இருளாமை என்றுறுமோ அன்றுசிறி துரைப்பேன்
என்னவும்நாண் ஈர்ப்பதிதற் கென்புரிவேன் தோழி.
ஆறாம் திருமுறை / திருவடிப் பெருமை
நாதமட்டும் சென்றனம்மேல் செல்லவழி அறியேம்
நவின்றபர விந்துமட்டும் நாடினம்மேல் அறியேம்
ஏதமிலாப் பரநாத எல்லைமட்டும் சென்றேம்
இனிச்செல்ல வழிகாணேம் இலங்குபெருவெளிக்கே
ஆதரவில் சென்றனம்மேல் செல்லவழி தெரியேம்
அம்மம்ம என்றுமறை ஆகமங்கள் எல்லாம்
ஓதநின்ற திருநடனப் பெருமானார் வடிவின்
உண்மைசொல வல்லவரார் உரையார்என் தோழி.
ஆறாம் திருமுறை / தோழிக் குரிமை கிளத்தல்
கிளக்கின்ற மறைஅளவை ஆகமப்பே ரளவை
கிளந்திடுமெய்ச் சாதனமாம் அளவைஅறி வளவை
விளக்கும்இந்த அளவைகளைக் கொண்டுநெடுங் காலம்
மேலவர்கள் அளந்தளந்து மெலிகின்றார் ஆங்கே
அளக்கின்ற கருவிஎலாம் தேய்ந்திடக் கண்டாரே
அன்றிஒரு வாறேனும் அளவுகண்டார் இலையே
துளக்கம்உறு சிற்றறிவால் ஒருவாறென் றுரைத்தேன்
சொன்னவெளி வரையேனும் துணிந்தளக்கப் படுமோ.
ஆறாம் திருமுறை / அடிமைப் பேறு
ஆரணமும் ஆகமமும் ஆங்காங் குணர்த்துகின்ற
காரணமும் காரியமும் காட்டுவித்தான் – பூரணன்சிற்
றம்பலத்தான் என்னாசை அப்பன் எலாவல்ல
செம்பலத்தை என்உளத்தே சேர்த்து.
ஆறாம் திருமுறை / சற்குருமணி மாலை
காரணம் இதுபுரி காரியம் இதுமேல்
காரண காரியக் கருவிது பலவாய்
ஆரணம் ஆகமம் இவைவிரித் துரைத்தே
அளந்திடும் நீஅவை அளந்திடன் மகனே
பூரண நிலைஅனு பவமுறில் கணமாம்
பொழுதினில் அறிதிஎப் பொருள்நிலை களுமே
தாரணி தனில்என்ற தயவுடை அரசே
தனிநட ராஜஎன் சற்குரு மணியே.
ஆறாம் திருமுறை / பந்தாடல்
சதுமறை ஆகம சாத்திரம் எல்லாம்
சந்தைப் படிப்புநம் சொந்தப் படிப்போ
விதுநெறி சுத்தசன் மார்க்கத்தில் சாகா
வித்தையைக் கற்றனன் உத்தரம் எனுமோர்
பொதுவளர் திசைநோக்கி வந்தனன் என்றும்
பொன்றாமை வேண்டிடில் என்தோழி நீதான்
அதுஇது என்னாமல் ஆடேடி பந்து
அருட்பெருஞ் சோதிகண் டாடேடி பந்து. ஆடேடி
ஆறாம் திருமுறை / கண்புருவப் பூட்டு
ஐயர்அருட் சோதியர சாட்சிஎன தாச்சு
ஆரணமும் ஆகமமும் பேசுவதென் பேச்சு
எய்யுலக வாழ்வில்எனக் கென்னைஇனி ஏச்சு
என்பிறவித் துன்பமெலாம் இன்றோடே போச்சு.
ஆறாம் திருமுறை / அனுபவ மாலை
என்கணவர் பெருந்தன்மை ஆறந்த நிலைக்கே
எட்டிநின்று பார்ப்பவர்க்கும் எட்டாதே தோழி
பொன்கணவர் கலைமடந்தை தன்கணவர் முதலோர்
புனைந்துரைக்கும் கதைபோல நினைந்துரைக்கப் படுமோ
புன்கணவர் அறியாதே புலம்புகின்றார் அவர்போல்
புகல்மறையும் ஆகமமும் புலம்புகின்ற தம்மா
உன்கணவர் திறம்புகல்என் றுரைக்கின்றாய் நீதான்
உத்தமனார் அருட்சோதி பெற்றிடமுன் விரும்பே.
ஆறாம் திருமுறை / அனுபவ மாலை
கூசுகின்ற தென்னடிநான் அம்பலத்தே நடிக்கும்
கூத்தாடிக் கணவருக்கே மாலையிட்டாய் எனவே
ஏசுகின்றார் ஆரடியோ அண்டபகி ரண்டத்
திருக்கின்ற சத்தர்களும் சத்திகளும் பிறரும்
பேசுகின்ற வார்த்தைஎலாம் வள்ளல்அருட் கூத்தின்
பெருமையலால் வேறொன்றும் பேசுகின்ற திலையே
வீசுகின்ற பெருஞ்சோதித் திருக்கூத்தின் திறமே
வேதமுடன் ஆகமங்கள் விளம்புகின்ற தன்றே.
ஆறாம் திருமுறை / அருட்பெருஞ்ஜோதி அகவல்
சமயங் கடந்த தனிப்பொருள் வெளியாய்
அமையுந் திருச்சபை யருட்பெருஞ் ஜோதி
சாதியு மதமுஞ் சமயமுங் காணா
ஆதிய நாதியா மருட்பெருஞ் ஜோதி
சாதியு மதமுஞ் சமயமும் பொய்யென
ஆதியி லுணர்த்திய வருட்பெருஞ் ஜோதி
சமயங் குலமுதற் சார்பெலாம் விடுத்த
அமயந் தோன்றிய வருட்பெருஞ் ஜோதி
ஆறாம் திருமுறை / முறையீடு
சாதிமதம் சமயம்எனும் சங்கடம்விட் டறியேன்
சாத்திரச்சே றாடுகின்ற சஞ்சலம்விட் டறியேன்
ஆதிஅந்த நிலையறியேன் அலைஅறியாக் கடல்போல்
ஆனந்தப் பெரும்போகத் தமர்ந்திடவும் அறியேன்
நீதிநெறி நடந்தறியேன் சோதிமணிப் பொதுவில்
நிருத்தமிடும் ஒருத்தர்திருக் கருத்தைஅறி வேனோ
ஏதிலர்சார் உலகினிடை எங்ஙனம்நான் புகுவேன்
யார்க்குரைப்பேன் என்னசெய்வேன் ஏதும்அறிந் திலனே.
ஆறாம் திருமுறை / திருக்கதவந் திறத்தல்
கூறுகின்ற சமயம்எலாம் மதங்கள்எலாம் பிடித்துக்
கூவுகின்றார் பலன்ஒன்றும் கொண்டறியார் வீணே
நீறுகின்றார் மண்ணாகி நாறுகின்றார் அவர்போல்
நீடுலகில் அழிந்துவிட நினைத்தேனோ நிலைமேல்
ஏறுகின்ற திறம்விழைந்தேன் ஏற்றுவித்தாய் அங்கே
இலங்குதிருக் கதவுதிறந் தின்னமுதம் அளித்தே
தேறுகின்ற மெய்ஞ்ஞான சித்திஉறப் புரிவாய்
சித்தசிகா மணியேஎன் திருநடநா யகனே.
ஆறாம் திருமுறை / பிள்ளைப் பெரு விண்ணப்பம்
இமையவர் பிரமர் நாரணர் முதலோர் எய்துதற் கரியபே ரின்பம்
தமைஅறிந் தவருட் சார்ந்தபே ரொளிநம் தயாநிதி தனிப்பெருந் தந்தை
அமையும்நம் உயிர்க்குத் துணைதிருப் பொதுவில் ஐயர் தாம் வருகின்ற சமயம்
சமயம்இப் போதென் றெண்ணிநான் இருக்கும் தன்மையும் திருவுளம் அறியும்.
ஆறாம் திருமுறை / சுத்த சன்மார்க்க வேண்டுகோள்
அச்சாநான் வேண்டுதல்கேட் டருள்புரிதல் வேண்டும்
ஆறந்த நிலைகளெலாம் அறிந்தடைதல் வேண்டும்
எச்சார்பும் ஆகிஉயிர்க் கிதம்புரிதல் வேண்டும்
எனைஅடுத்தார் தமக்கெல்லாம் இன்புதரல் வேண்டும்
இச்சாதி சமயவிகற் பங்களெலாம் தவிர்த்தே
எவ்வுலகும் சன்மார்க்கப் பொதுவடைதல் வேண்டும்
உச்சாதி அந்தமிலாத் திருவடிவில் யானும்
உடையாயும் கலந்தோங்கும் ஒருமையும்வேண் டுவனே.
ஆறாம் திருமுறை / ஆன்ம தரிசனம்
சாதியும் மதமும் சமயமும் தவிர்ந்தேன்
சாத்திரக் குப்பையும் தணந்தேன்
நீதியும் நிலையும் சத்தியப் பொருளும்
நித்திய வாழ்க்கையும் சுகமும்
ஆதியும் நடுவும் அந்தமும் இல்லா
அருட்பெருஞ் சோதிஎன் றறிந்தேன்
ஓதிய அனைத்தும் நீஅறிந் ததுநான்
உரைப்பதென் அடிக்கடி உனக்கே.
ஆறாம் திருமுறை / அபயத் திறன்
புல்லவா மனத்தேன் என்னினும் சமயம்
புகுதவா பொய்ந்நெறி ஒழுக்கம்
சொல்லவா பிறரைத் துதிக்கவா சிறிதோர்
சொப்பனத் தாயினும் நினையேன்
கல்லவா மனத்தோர் உறவையுங் கருதேன்
கனகமா மன்றிலே நடிக்கும்
நல்லவா எல்லாம் வல்லவா உனையே
நம்பினேன் கைவிடேல் எனையே.
ஆறாம் திருமுறை / சிவானந்தத் தழுந்தல்
இருட்சாதித் தத்துவச் சாத்திரக் குப்பை
இருவாய்ப்புப் புன்செயில் எருவாக்கிப் போட்டு
மருட்சாதி சமயங்கள் மதங்களாச் சிரம
வழக்கெலாம் குழிக்கொட்டி மண்மூடிப் போட்டுத்
தெருட்சாருஞ் சுத்தசன் மார்க்கநன் னீதி
சிறந்து விளங்கஓர் சிற்சபை காட்டும்
அருட்சோதி வீதியில் ஆடச்செய் தீரே
அருட்பெருஞ் ஜோதிஎன் ஆண்டவர் நீரே.
ஆறாம் திருமுறை / அருள்விளக்க மாலை
சாதிகுலம் சமயமெலாம் தவிர்த்தெனைமேல் ஏற்றித்
தனித்ததிரு அமுதளித்த தனித்தலைமைப் பொருளே
ஆதிநடுக் கடைகாட்டா தண்டபகி ரண்டம்
ஆருயிர்கள் அகம்புறம்மற் றனைத்தும்நிறை ஒளியே
ஓதிஉணர்ந் தவர்எல்லாம் எனைக்கேட்க எனைத்தான்
ஓதாமல் உணர்ந்துணர்வாம் உருவுறச்செய் உறவே
சோதிமய மாய்விளங்கித் தனிப்பொதுவில் நடிக்கும்
தூயநடத் தரசேஎன் சொல்லும்அணிந் தருளே.
ஆறாம் திருமுறை / அருள்விளக்க மாலை
இச்சைஒன்றும் இல்லாதே இருந்தஎனக் கிங்கே
இயலுறுசன் மார்க்கநிலைக் கிச்சையைஉண் டாக்கித்
தச்சுறவே பிறமுயற்சி செயுந்தோறும் அவற்றைத்
தடையாக்கி உலகறியத் தடைதீர்த்த குருவே
எச்சமய முடிபுகளும் திருச்சிற்றம் பலத்தே
இருந்தஎன எனக்கருளி இசைவித்த இறையே
முச்சகமும் புகழமணி மன்றிடத்தே நடிக்கும்
முதல்அரசே என்னுடைய மொழியும்அணிந் தருளே.
ஆறாம் திருமுறை / அருள்விளக்க மாலை
மதம்என்றும் சமயம்என்றும் சாத்திரங்கள் என்றும்
மன்னுகின்ற தேவர்என்றும் மற்றவர்கள் வாழும்
பதம்என்றும் பதம்அடைந்த பத்தர்அனு பவிக்கப்
பட்டஅனு பவங்கள்என்றும் பற்பலவா விரிந்த
விதம்ஒன்றும் தெரியாதே மயங்கியஎன் தனக்கே
வெட்டவெளி யாஅறிவித் திட்டஅருள் இறையே
சதம்ஒன்றும் சுத்தசிவ சன்மார்க்கப் பொதுவில்
தனிநடஞ்செய் அரசேஎன் சாற்றும்அணிந் தருளே.
ஆறாம் திருமுறை / அருள்விளக்க மாலை
கொள்ளைவினைக் கூட்டுறவால் கூட்டியபல் சமயக்
கூட்டமும்அக் கூட்டத்தே கூவுகின்ற கலையும்
கள்ளமுறும் அக்கலைகள் காட்டியபல் கதியும்
காட்சிகளும் காட்சிதரு கடவுளரும் எல்லாம்
பிள்ளைவிளை யாட்டெனநன் கறிவித்திங் கெனையே
பிள்ளைஎனக் கொண்டுபிள்ளைப் பெயரிட்ட பதியே
அடுத்தானை அடியேனை அஞ்சேல் என்றிங்
காண்டானைச் சிறுநெறிகள் அடையா தென்னைத்
தடுத்தானைப் பெருநெறிக்குத் தடைதீர்த் தானைத்
தன்னருளும் தன்பொருளும் தானே என்பால்
கொடுத்தானைக் குற்றமெலாம் குணமாக் கொள்ளும்
குணத்தானைச் சமயமதக் குழிநின் றென்னை
எடுத்தானை எல்லாஞ்செய் வல்ல சித்தே
ஈந்தானைக் கண்டுகளித் திருக்கின் றேனே.
ஆறாம் திருமுறை / இறை திருக்காட்சி
சமயமும் மதமும் கடந்ததோர் ஞான
சபைநடம் புரிகின்ற தனியைத்
தமைஅறிந் தவருட் சார்ந்தமெய்ச் சார்வைச்
சத்துவ நித்தசற் குருவை
அமையஎன் மனத்தைத் திருத்திநல் லருளா
ரமுதளித் தமர்ந்தஅற் புதத்தை
ஆறாம் திருமுறை / திருவடி நிலை
இகத்துழல் பகுதித் தேவர்இந் திரன்மால்
பிரமன்ஈ சானனே முதலாம்
மகத்துழல் சமய வானவர் மன்றின்
மலரடிப் பாதுகைப் புறத்தும்
புகத்தரம் பொருந்தா மலத்துறு சிறிய
புழுக்கள்என் றறிந்தனன் அதன்மேல்
செகத்தொடர் பிகந்தார் உளத்தமர் ஒளியில்
தெரிந்தனன் திருவடி நிலையே.
ஆறாம் திருமுறை / அச்சோப் பத்து
சாதியைநீள் சமயத்தை மதத்தைஎலாம்
விடுவித்தென் தன்னை ஞான
நீதியிலே சுத்தசிவ சன்மார்க்க
நிலைதனிலே நிறுத்தி னானைப்
ஆறாம் திருமுறை / பொதுநடம் புரிகின்ற பொருள்
தத்துவ பதியே தத்துவம் கடந்த
தனித்ததோர் சத்திய பதியே
சத்துவ நெறியில் சார்ந்தசன் மார்க்கர்
தமக்குளே சார்ந்தநற் சார்பே
பித்துறு சமயப் பிணக்குறும் அவர்க்குப்
பெறல்அரி தாகிய பேறே
புத்தமு தளித்தென் உளத்திலே கலந்து
பொதுநடம் புரிகின்ற பொருளே.
ஆறாம் திருமுறை / சிற்சத்தி துதி
வெறிக்கும் சமயக் குழியில்விழ விரைந்தேன் தன்னை விழாதவகை
மறிக்கும் ஒருபே ரறிவளித்த வள்ளற் கொடியே மனக்கொடியைச்
செறிக்கும் பெரியர் உளத்தோங்கும் தெய்வக் கொடியே சிவஞானம்
குறிக்கும் கொடியே ஆனந்தக் கொடியே அடியேற் கருளுகவே.
ஆறாம் திருமுறை / இறை பொறுப் பியம்பல்
ஊடல்செய் மதமும் சமயமும் இவற்றில்
உற்றகற் பனைகளும் தவிர்ந்தேன்
வாடல்செய் மனத்தால் கலங்கினேன் எனினும்
மன்றினை மறந்ததிங் குண்டோ
ஆடல்செய் பாதம் அறியநான் அறியேன்
ஐயவோ சிறிதும்இங் காற்றேன்
பாடல்செய் கின்றேன் படிக்கின்றேன் எனக்குப்
பரிந்தருள் புரிவதுன் கடனே.
ஆறாம் திருமுறை / சிவபுண்ணியப் பேறு
மதத்திலே சமய வழக்கிலே மாயை
மருட்டிலே இருட்டிலே மறவாக்
கதத்திலே மனத்தை வைத்துவீண் பொழுது
கழிக்கின்றார் கழிக்கநான் உன்பூம்
பதத்திலே மனத்தை வைத்தனன் நீயும்
பரிந்தெனை அழிவிலா நல்ல
பதத்திலே வைத்தாய் எனக்கிது போதும்
பண்ணிய தவம்பலித் ததுவே.
ஆறாம் திருமுறை / சிவபுண்ணியப் பேறு
குலத்திலே சமயக் குழியிலே நரகக்
குழியிலே குமைந்துவீண் பொழுது
நிலத்திலே போக்கி மயங்கிஏ மாந்து
நிற்கின்றார் நிற்கநான் உவந்து
வலத்திலே நினது வசத்திலே நின்றேன்
மகிழ்ந்துநீ என்உளம் எனும்அம்
பலத்திலே நின்றாய் எனக்கிது போதும்
பண்ணிய தவம்பலித் ததுவே.
ஆறாம் திருமுறை / ஆனந்தப் பரிவு
சாதிமதம் சமயமுதற் சங்கற்ப விகற்பம்எலாம் தவிர்ந்து போக
ஆதிநடம் புரிகின்றான் அருட்சோதி எனக்களித்தான் அந்தோ அந்தோ.
ஆறாம் திருமுறை / தலைவி வருந்தல்
இச்சைஎலாம் வல்லதுரை என்னைமணம் புரிந்தார்
ஏடிஎனக் கிணைஎவர்கள் என்றஅத னாலோ
எச்சமயத் தேவரையும் இனிமதிக்க மாட்டேன்
என்றுசொன்னேன் இதனாலோ எதனாலோ அறியேன்
நச்சுமரக் கனிபோலே பாங்கிமனங் கசந்தாள்
நயந்தெடுத்து வளர்த்தவளும் கயந்தெடுப்புப் புகன்றாள்
அச்சமிலாள் இவள்என்றே அலர்உரைத்தார் மடவார்
அண்ணல்நட ராயர்திரு எண்ணம்அறிந் திலனே.
ஆறாம் திருமுறை / தோழிக் குரிமை கிளத்தல்
சிவமயமே வேறிலைஎல் லாம்எனநீ தானே
தேமொழியாய் பற்பலகால் செப்பியிடக் கேட்டேன்
தவமயத்தார் பலசமயத் தலைவர்மதத் தலைவர்
தத்துவர்தத் துவத்தலைவர் அவர்தலைவர் தலைவர்
இவர்அவர்என் றயல்வேறு பிரித்தவர்பால் வார்த்தை
இயம்புவதென் என்றாய்ஈ தென்கொல்என்றாய் தோழி
நவமயம்நீ உணர்ந்தறியாய் ஆதலில்இவ் வண்ணம்
நவின்றனைநின் ஐயமற நான்புகல்வேன் கேளே.
ஆறாம் திருமுறை / நடராஜபதி மாலை
பேருற்ற உலகிலுறு சமயமத நெறிஎலாம்
பேய்ப்பிடிப் புற்றபிச்சுப்
பிள்ளைவிளை யாட்டென உணர்ந்திடா துயிர்கள்பல
பேதமுற் றங்கும்இங்கும்
போருற் றிறந்துவீண் போயினார் இன்னும்வீண்
போகாத படிவிரைந்தே
புனிதமுறு சுத்தசன் மார்க்கநெறி காட்டிமெய்ப்
பொருளினை உணர்த்திஎல்லாம்
ஏருற்ற சுகநிலை அடைந்திடப் புரிதிநீ…
ஆறாம் திருமுறை / சற்குருமணி மாலை
பன்னெறிச் சமயங்கள் மதங்கள்என் றிடும்ஓர்
பவநெறி இதுவரை பரவிய திதனால்
செந்நெறி அறிந்திலர் இறந்திறந் துலகோர்
செறிஇருள் அடைந்தனர் ஆதலின் இனிநீ
புன்னெறி தவிர்த்தொரு பொதுநெறி எனும்வான்
புத்தமு தருள்கின்ற சுத்தசன் மார்க்கத்
தன்னெறி செலுத்துக என்றஎன் அரசே
தனிநட ராஜஎன் சற்குரு மணியே.
ஆறாம் திருமுறை / சற்குருமணி மாலை
ஆதியும் அந்தமும் இன்றிஒன் றாகி
அகம்புறம் அகப்புறம் புறப்புறம் நிறைந்தே
ஓதியும் உணர்ந்தும்இங் கறிவரும் பொருளே
உளங்கொள்சிற் சபைநடு விளங்குமெய்ப் பதியே
சோதியும் சோதியின் முதலுந்தான் ஆகிச்
சூழ்ந்தெனை வளர்க்கின்ற சுதந்தர அமுதே
சாதியும் சமயமும் தவிர்த்தவர் உறவே
தனிநட ராஜஎன் சற்குரு மணியே.
ஆறாம் திருமுறை / புனித குலம் பெறுமாறு புகலல்
சாதியிலே மதங்களிலே சமயநெறி களிலே
சாத்திரச்சந் தடிகளிலே கோத்திரச்சண் டையிலே
ஆதியிலே அபிமானித் தலைகின்ற உலகீர்
அலைந்தலைந்து வீணேநீர் அழிதல்அழ கலவே
நீதியிலே சன்மார்க்க நிலைதனிலே நிறுத்த
நிருத்தமிடும் தனித்தலைவர் ஒருத்தர்அவர் தாமே
வீதியிலே அருட்சோதி விளையாடல் புரிய
மேவுகின்ற தருணம்இது கூவுகின்றேன் உமையே.
ஆறாம் திருமுறை / சுத்த சிவநிலை
சாதிகுலம் என்றும் சமயமதம் என்றுமுப
நீதிஇயல் ஆச்சிரம நீட்டென்றும் – ஓதுகின்ற
பேயாட்ட மெல்லாம் பிதிர்ந்தொழிந்த வேபிறர்தம்
வாயாட்டம் தீர்ந்தனவே மற்று.
ஆறாம் திருமுறை / மரணமிலாப் பெருவாழ்வு
குறித்துரைக்கின் றேன்இதனைக் கேண்மின் இங்கே வம்மின்
கோணும்மனக் குரங்காலே நாணுகின்ற உலகீர்
வெறித்தஉம்மால் ஒருபயனும் வேண்டுகிலேன் எனது
மெய்யுரையைப் பொய்யுரையாய் வேறுநினை யாதீர்
பொறித்தமதம் சமயம்எலாம் பொய்பொய்யே அவற்றில்
புகுதாதீர் சிவம்ஒன்றே பொருள்எனக்கண் டறிமின்
செறித்திடுசிற் சபைநடத்தைத் தெரிந்துதுதித் திடுமின்
சித்திஎலாம் இத்தினமே சத்தியம்சேர்ந் திடுமே.
ஆறாம் திருமுறை / தனித் திருஅலங்கல்
கிழக்குவெளுத் ததுகருணை அருட்சோதி உதயம்
கிடைத்ததென துளக்கமலம் கிளர்ந்ததென தகத்தே
சழக்குவெளுத் ததுசாதி ஆச்சிரமா சாரம்
சமயமதா சாரம்எனச் சண்டையிட்ட கலக
வழக்குவெளுத் ததுபலவாம் பொய்ந்நூல்கற் றவர்தம்
மனம்வெளுத்து வாய்வெளுத்து வாயுறவா தித்த
முழுக்குவெளுத் ததுசிவமே பொருள்எனும்சன் மார்க்க
முழுநெறியில் பரநாத முரசுமுழங் கியதே.
ஆறாம் திருமுறை / தனித் திருஅலங்கல்
சாதியும் மதமும் சமயமும் தவிர்த்தே
சத்தியச் சுத்தசன் மார்க்க
வீதியில் உமைத்தான் நிறுவுவல் உண்மை
விளம்பினேன் வம்மினோ விரைந்தே.
ஆறாம் திருமுறை / மெய்யருள் வியப்பு
சமயத் தெய்வம் பலவும் சிறிய துரும்ப தென்ன வே
சாற்றப் புகினும் சாலார்அருளின் பெருமை உன்ன வே
அமையும் அண்டப் பகுதி பலவும் அணுவின் பொடியி லே
அனந்தத் தொன்றென் றுரைத்துஞ் சாலா நின்பொன் னடியி லே.
ஆறாம் திருமுறை / இது நல்ல தருணம்
மதித்த சமயமத வழக்கெல்லா மாய்ந்தது
வருணாச் சிரமம்எனு மயக்கமும் சாய்ந்தது
கொதித்த லோகாசாரக் கொதிப்பெல்லாம் ஒழிந்தது
கொலையும் களவுமற்றைப் புலையும் அழிந்தது. இதுநல்ல
ஆறாம் திருமுறை / அருள் அற்புதம்
சாதி சமயச் சழக்கெலாம் அற்றது
சன்மார்க்க ஞான சபைநிலை பெற்றது
மேதியிற் சாகாத வித்தையைக் கற்றது
மெய்யருட் சோதிஎன் உள்ளத்தில் உற்றது அற்புதம்
ஆறாம் திருமுறை / அருட்காட்சி
சாதி சமயச் சழக்கைவிட் டேன்அருட்
சோதியைக் கண்டேன டி – அக்கச்சி
சோதியைக் கண்டேன டி.
ஆறாம் திருமுறை / கண்புருவப் பூட்டு
சிற்சபையும் பொற்சபையும் சொந்தமென தாச்சு
தேவர்களும் மூவர்களும் பேசுவதென் பேச்சு
இற்சமய வாழ்வில்எனக் கென்னைஇனி ஏச்சு
என்பிறப்புத் துன்பமெலாம் இன்றோடே போச்சு. *****************
வள்ளலார் கண்ட சமரச சுத்த சன்மார்க்கம் என்பது; உலகில் வெளிப்பட்டுள்ள வைதீக மதமோ, சைவம், வைணவம், சமணம், பவுத்தம் போன்ற சமயமோ, வேதாந்தம், சித்தாந்தம் முதலிய மதங்களோ, இதிகாசங்கள், புராணங்களோ, மற்ற உலக சமய, மத, மார்க்கங்களோ இல்லை. இவையின் கிளையோ இல்லை. ஏற்கனவே வெளிப்பட்டுள்ள துவைதமோ, அத்வைதமோ, ஓரிறை கொள்கையோ, விசிட்டாத்வைதமோ, இயற்கை விதியோ, தாசமார்க்கமோ, சற்புத்திர மார்க்கமோ, சக மார்க்கமோ இல்லை. மேலும், வெளிபடுத்தப்பட்ட சாதன வகைகள் சரியை, கிரியை, யோகமோ, ஞானமோ இல்லை.
சுத்த சன்மார்க்கம் தனி கடவுள், தனி வழிபாடு, பெரும்பயன் கொண்டு விளங்கும் ஓர் உண்மை பொது நெறி மற்றும் தனி நெறியாகும். பத்தொன்பதாம் நூற்றாண்டில் தோன்றிய ஒரு புதிய மார்க்கம்.
அதே நேரத்தில் சுத்த சன்மார்க்க தனி நெறியானது; எல்லா சமயங்களுக்கும், எல்லா மதங்களுக்கும் எல்லா மார்க்கங்களுக்கும் உண்மை பொது நெறியாகும்.
இதன் கோட்பாடுகள் நீதிமன்றத்தில் உறுதிபடுத்தப்பட்டு, நீதிமன்ற உத்தரவுகளால், வள்ளலாரின் தனி வழிபாட்டு விதிகள் படி ஜோதி தரிசனம் காட்டப்படுகிறது.
வள்ளலாரின் சுத்த சன்மார்க்கம் இதுவே எனத் தெளிக: APJ அருள்.
உண்மை கடவுளின் உண்மை நிலை காணும் அறிவு மார்க்கம்.
காலம் காணாது, படி நிலைகள் இல்லா சிற்றம்பலத்தில் நிற்றல்
கடவுளையே உண்மையை தெரிவித்து விளக்கச் சொல்லும் தனி வழி,
புறத்தில் உயிர்களிடம் தயவு காட்டும் உணர்வும் இரக்கமும் மட்டுமே
அகத்தில் ஆண்டவரின் திருக்காட்சி கண்டு களித்து அன்பு செலுத்துதல்
அண்ட பிண்டம் பற்றிய விசாரமும் கருணையில் முயற்சியுமே பயிற்சி
நமது சிறுமை,தரத்தையும் கடவுளின் பெருமை,தரத்தையும் விசாரித்தல்
எல்லா உயிர்களும் இன்புற்று வாழ்க என்றப் பொது பிரார்த்தனை
பத்தொன்பதாம் நூற்றாண்டில் தோன்றிய புதிய / பொது மார்க்கம்,
சாதி சமயம் மதம் இவை பொய், கடவுள் உண்டு என்ற தனி நெறி
சாதிசமய கட்டுப்பாட்டு ஆசாரங்கள் ஒழிக்கப்படவேண்டும்,இதுகட்டளை
உண்மை அறிவு வழங்கி பொது நோக்கம் வருவித்தல்,இதுவே ஆசாரம்
சமய மத அனுபவங்கள் இல்லாது கடந்து விளங்கும் தனி அனுபவம்
ஆண்டவரே விரைந்து வந்து உண்மை தெரிவி, கண்ணீரால் வழிபாடு
அக அனுபவமே உண்மை, உபாயமார்க்க வழி கூடாது, இது சத்தியம்
ஓங்கும் பெருவெளி முழுதும் அறிவு மயம் அறிவின் வடிவம் ஒளி
பெருவெளியில் ஒளியால் எல்லாம் தோற்றம் தொன்றியவையுள் ஒளி
இயற்கை உண்மை இயற்கை விளக்கம் இயற்கை இன்பமாகிய ஜோதி
சொர்க்கம் நரகம் விசாரமில்லாது சாகாக்கல்வி தரம் அறிதல் அறிவு
மலம் ஐந்தும் வெல்லும் வல்லபம், கடவுள் ஒருவரே என்ற உணர்ச்சி
சாகாத்தலை, வேகாக்கால்,போகாப்புனல் மூன்றும் ஞான யோகக்காட்சி
ஒன்றேனும்ஒன்றாகிய தனிப் பதியாகிய பெருங்கருணை கடவுள்
மரணமில்லாது வாழும் பேரின்ப பெருவாழ்வே அதி தீவிர விருப்பம்
அவத்தைகளை நீக்கிக்கொண்டு நித்திய தேகம் பெறுவதே அருள்
தினம்தினம் அண்ட பிண்ட திறம் கண்டு இறை நடத்தரிசனம் இன்பம்
அருட்பெருஞ்ஜோதி அருட்பெருஞ்ஜோதி
தனிப்பெருங்கருணை அருட்பெருஞ்ஜோதி
–APJ ARUL—
